Sidebar

07
Ат, Лют

«Кулінарныя словы: паходжанне і ўжыванне»: мы адны з першых убачылі будучую кнігу

Оформление
  • Мин. Малинький Средний Большой Макс.
  • По умолчанию Helvetica Segoe Georgia Times

«Кулінарныя словы: паходжанне і ўжыванне» – гэта сваё выданне з серыі книг «Беларускае слоўка» у канферэнц-зале Барысаўскай цэнтральнай раённай бібліятэцы імя І.Х. Каладзеева прэзентаваў загадчык кафедры рэдакцыйна-выдавецкіх тэхналогій факультэта прынттэхналогій і медыякамунікацый Беларускага дзяржаўнага тэхналагічнага універсітэта, кандыдат філалагічных навук, дацэнт Уладзімір Іванавіч Куліковіч.

Сустрэча прайшла з удзелам студэнтаў аддзялення прафесій грамадскага харчавання Барысаўскага дзяржаўнага каледжа, навучэнцаў дзевятых і адзінаццатых класаў гімназіі №3 і сярэдняй школы №10 г. Барысава, педагогаў і супрацоўнікаў цэнтральнай бібліятэкі. Акрамя таго, Уладзімір Іванавіч прыбыў з памочніцамі – студэнткамі-выпускніцамі БДТУ, якія разам са сваім выкладчыкам расказалі аб асаблівасцях разнапланавай вучобы і перспектывах прафесійнага вызначэння і росту студэнтаў як будучых спецыялістаў. Гэта значыць, што мерапрыемства насіла не толькі канкрэтны пазнавальны кулінарна-філалагічны характар, але і прафарыентацыйны.
Уладзімір Куліковіч прадставіў не толькі «Кулінарныя словы: паходжанне і ўжыванне» (над ёй працавалі і студэнты аўтара). Цікавасць прысутных выклікалі першая кніга з серыі «Беларускае слоўка» – «Беларускія месяцы: чаму іх так называюць», а таксама зборнік навуковых артыкулаў па матэрыялах V Міжнароднага форуму «Скарынаўскія чытанні – 2021. Роля кнігі ў сучасным грамадстве», падрыхтаваны на кафедры рэдакцыйна-выдавецкіх тэхналогій БДТУ. Дарэчы, кандыдат філалагічных навук, дацэнт У.І. Куліковіч з'яўляецца аўтарам і серыі кніг для падрыхтоўкі да алімпіяды па беларускай мове і літаратуры – «Дзённік алімпіёніка. Выпуск 3» (у гэтага выдання маюцца папяровы і электронны варыянты).
Варта адзначыць, што ў шматлюднай аўдыторыі сумаваць і адцягвацца на штосьці старонняе было абсалютна некалі. Уладзімір Іванавіч, так бы мовіць, «сышоў у народ»: юныя і дарослыя ўдзельнікі прэзентацыі выдання «Кулінарныя словы: паходжанне і ўжыванне» стараліся растлумачыць значэнне беларускамоўных слоў, прапанаваных на экране вялікага манітора, адказвалі на пытанні Куліковіча. Нават можна было ўнесці свае прапановы і праўкі ў выданне, паколькі аўтар дэманстраваў сігнальны экзэмпляр, выхад якога чакаецца прыкладна праз паўгода. Пагадзіцеся, прыемна апынуцца ў ліку першых, хто ўбачыў і патрымаў у руках будучую кнігу. Спадзяемся, што наша бібліятэка ў ліку першых атрымае гэты зборнік пасля яго канчатковага выхаду ў свет.
А каб было яшчэ весялей і актыўней, імпрэзу ўпрыгожылі песні ў выкананні студэнтак БДТУ пра Беларусь і пра бульбу. Прычым песеньку пра бульбу некалькі разоў нават спявала ўся зала!
Самаму актыўнаму ўдзельніку (а ім аказаўся студэнт аддзялення прафесій грамадскага харчавання БГК) Уладзімір Іванавіч уручыў кнігу «Беларускія месяцы: чаму іх так называюць» з асабістым подпісам. В.І. Куліковіч падарыў кнігі і бібліятэцы Каладзеева. Таксама прадстаўленыя ў гэты дзень выданні змог набыць любы ахвочы за сімвалічны кошт.
Сустрэча завяршылася фотасесіяй на памяць. А перад ад'ездам у Мінск гасцям прапанавалі кароткі экскурс па выставачных залах нашай установы культуры.
Алена БРЫЦКАЯ

2022-10-31