Пісьменнік, філосаф, гуманіст.

Змітрок Бядуля (Самуіл Яфімавіч Плаўнік) належыць да кагорты беларускіх пісьменнікаў, якія закладвалі падмурак беларускай літаратуры ХХ стагоддзя. На чале гэтай кагорты стаялі магутныя таленты, пісьменнікі агромністай мастацкай сілы, якіх з глыбінь шматвяковага духоўнага жыцця падняў беларускі народ, - Я. Купала і Я. Колас. Багатую спадчыну пакінуў нам З. Бядуля. Яна шматтомная, у ёй – лірычныя імпрэсіі, замалёўкі, публіцыстычныя артыкулы, даследаванні, вершы, паэмы, нарысы, апавяданні, аповесці, казкі, п’есы, раман… Паэзія З. Бядулі характарызуецца небывалым эмацыянальным напружаннем, непахіснасцю, бескампраміснасцю ў змаганні за беларускую нацыянальную ідэю. Мова твораў З. Бядулі чаравала сваёй мягкасцю і сакавітасцю; вельмі блізкая да народнай. Яна адначасова была высокакультурнай мовай, здольнай выказаць самыя тонкія адчуванні. Для яго творчасці характэрны інтэлегентнасць і тонкі псіхалагізм у выяўленні пачуццяў герояў. Ён верыў, што беларус стане гаспадаром сваёй зямлі, ён верыў, што беларускае поле закрасуецца, закаласіцца пад гарачым сонцам раскошна і багата. З. Бядуля не шкадуе цёплых і ўзвышаных слоў, каб узвялічыць самаахвярных сейбітаў на ніве беларускай культуры. Ён піша пра Багдановіча: “… і хто пачуе яго агнявыя песні, той ужо не можа не любіць свайго краю, свайго народу, сваёй роднай мовы…” Роднай зямлі З. Бядуля аддаў усе свае сілы і ўсю цеплыню свайго сэрца і над ёю заўсёды будзе лунаць яго неспакойны творчы дух. На выставе прадстаўлены матэрыялы аб жыцці і творчай дзейнасці З. Бядулі – яго лепшыя вершы, аповесці, апавяданні, публіцыстычныя артыкулы, успаміны яго брата Мацея Плаўніка, Уладзіславы Луцэвіч, жонкі Я. Купалы і інш. Выстава будзе дзейчаць да 23 мая.

2021-04-21